సుదర్శన్‌ చక్ర భారత స్వదేశీ ఐరన్‌ డోమ్
భారతదేశం రక్షణ వ్యవస్థలో కీలక నిర్ణయం తీసుకుంది. ఇజ్రాయెల్‌ ఐరన్‌ డోమ్ తరహాలోనే, కానీ మరింత ఆధునికంగా ఉండే సుదర్శన్‌ చక్ర మిషన్ను ప్రధానమంత్రి నరేంద్ర మోదీ ఎర్రకోట నుండి ప్రకటించారు. ఈ ప్రాజెక్ట్‌ పూర్తిగా స్వదేశీ సాంకేతికతతో అభివృద్ధి చేయబడి, నగరాలను, పురాతన కట్టడాలను, సైనిక స్థావరాలను, దేవాలయాలను, ఆసుపత్రులను ఇలా కీలక వనరులను డ్రోన్లు, స్టెల్త్‌ విమానాలు, హైపర్‌సోనిక్‌ క్షిపణుల ముప్పు నుండి కాపడుకోవడానికి ఈ సుదర్శన చక్ర ఉపయోగపడుతుంది.
IADWS విజయవంతమైన పరీక్ష:
ఈ దిశగా ఇప్పటికే పని మొదలయ్యింది. ఒడిశా తీరంలో ఇంటిగ్రేటెడ్ ఎయిర్ డిఫెన్స్ వెపన్ సిస్టమ్ (IADWS) విజయవంతంగా పరీక్షించబడింది. మూడు వేర్వేరు లక్ష్యాలను ఒకేసారి ధ్వంసం చేయడం ద్వారా, ఈ స్వదేశీ వ్యవస్థ తన సామర్థ్యాన్ని నిరూపించింది. ఇది డ్రోన్లు, క్రూయిజ్‌ మిస్సైళ్లు, యుద్ధ విమానాలను ఎదుర్కోగల కవచం అని నిరూపితమైంది.
ఇది మల్టీ లేయర్స్ డోమ్:
IADWSలో మూడు ప్రధాన పొరలు ఉన్నాయి –
QRSAM: 30 కి.మీ. పరిధిలో విమానాలు, హెలికాప్టర్లు, డ్రోన్లు, క్షిపణులను అడ్డుకుంటుంది.
VSHORADS: సైనికులు మోసుకెళ్లగల చిన్న ఆయుధ వ్యవస్థ, తక్కువ ఎత్తులోని లక్ష్యాలను కూలద్రోయగలదు.
DEW (Directed Energy Weapon): అధిక శక్తి లేజర్‌లు, 3.5 కి.మీ. పరిధిలోని ముప్పును తక్షణమే ధ్వంసం చేస్తాయి.
రాడార్‌, కమాండ్‌ & కంట్రోల్‌ సెంటర్‌ రాడార్‌లు ఆకాశంలో ముప్పులను గుర్తించి, డేటాను వెంటనే కేంద్రీకృత నెట్‌వర్క్‌కి పంపిస్తాయి. దాని ఆధారంగా సరైన క్షిపణి లేదా ఆయుధాన్ని ఎంపిక చేసి ప్రయోగిస్తారు. ప్రతి దాడి ప్రాంతానికి సరైన ప్రతిఘటనను కొన్ని సెకన్లలోనే అందిస్తుంది.
భవిష్యత్తు యుద్ధాలకు దీటైన సమాధానం:
నేటి యుద్ధాలు కేవలం సరిహద్దుల్లోనే జరగవు. స్టెల్త్‌ టెక్నాలజీ, డ్రోన్లు, క్రూయిజ్‌ మిస్సైళ్లు, హైపర్‌సోనిక్‌ ఆయుధాలు ఏ క్షణంలోనైనా ఎక్కడికైనా చేరగలవు. అటువంటి సందర్భాల్లో ఒకే రక్షణ వ్యవస్థ సరిపోదు. అందుకే IADWS వంటి బహుళ-పొరల, నెట్‌వర్క్‌ ఆధారిత కవచం అత్యవసరమైంది.
సుదర్శన్‌ చక్రం శ్రీకృష్ణుని ప్రేరణ:
ఈ కొత్త ప్రాజెక్ట్‌కు పేరు సుదర్శన్‌ చక్రం. హిందూ పురాణాలలో శ్రీకృష్ణుడు వినియోగించిన దివ్యాయుధం. 2035 నాటికి మొత్తం భారత్ అంతటా ఈ కవచాన్ని అమలు చేయాలని లక్ష్యం. ఇది కేవలం రక్షణ మాత్రమే కాదు, ముప్పు మూలాన్ని ఎదురుదాడి చేయగల సామర్థ్యం కలిగిన ప్రాజెక్ట్‌.
డొమైన్‌ల అంతటా ఒకే వ్యవస్థ:
భూ, గగన, సముద్ర, అంతరిక్షం, సైబర్‌ రంగాలన్నింటిలోనూ సమన్వయంతో పనిచేయడం ఈ ప్రాజెక్ట్‌ ప్రత్యేకత. AI ఆధారిత ట్రాకింగ్, జామర్లు, సైబర్‌ రక్షణ, అధునాతన రాడార్‌లతో ఈ వ్యవస్థ ఒకే వేదికలో సమగ్ర రక్షణ కల్పిస్తుంది.
ఆపరేషన్‌ సిందూర్ నుండి అనుభవంతో:
పాకిస్తాన్, చైనా కలసి చేసిన డ్రోన్‌–క్షిపణి దాడులను భారతీయ వ్యవస్థలు ఎదుర్కొన్న ఆపరేషన్‌ సిందూర్ అనుభవం ఈ మిషన్‌ అవసరాన్ని మరింత బలపరిచింది. దిగుమతి చేసుకున్న వ్యవస్థలపై ఆధారపడటం సురక్షితం కాదన్న పాఠం భారతదేశం తెలుసుకుంది.
ప్రపంచ యుద్ధ అనుభవాలు:
ఇజ్రాయెల్‌ ఐరన్‌ డోమ్, అమెరికా పేట్రియట్‌, రష్యా S-400, చైనా HQ సిరీస్‌ వంటి వ్యవస్థలు ఇప్పటికే తమదైన మోడళ్లను అభివృద్ధి చేశాయి. భారత్ మాత్రం తన అవసరాలకు సరిపడే స్వదేశీ, బహుళ-పొరల కవచం ను తయారుచేయాలనే ధృఢ నిశ్చయంతో ముందుకు సాగుతోంది.
మిషన్‌ సుదర్శన్‌ చక్రం భారత రక్షణ చరిత్రలో ఒక సరైన నిర్ణయం. ఇది శత్రువుల దాడులను అడ్డుకోవడమే కాదు, వారిని సాహసోపేతంగా ఎదుర్కోగల అజేయ ధైర్యాన్ని మన సైనికులలో రగిలిస్తుంది. 2035 నాటికి ఇది పూర్తిస్థాయిలో సిద్ధమయ్యే సరికి, భారత్ ఇక కేవలం తన సరిహద్దులను కాపాడుకునే దేశం మాత్రమే కాకుండా, ప్రపంచ రక్షణ వ్యవస్థ లో అగ్రగామిగా నిలిచే మహాశక్తిగా అవతరిస్తుంది. -రాజశేఖర్ నన్నపనేని, Mega Minds
Click the below Image & Join MegaMindsIndia WhatsApp Group.
Indian Army, Sudarshan Chakra Defence System, India Indigenous Iron Dome, Indian Missile Defence System, Bharat Sudarshan Chakra DRDO, Indian Army Air Defence Technology, Iron Dome vs Sudarshan ChakraI, Indigenous Defence Innovation India
